افتتاحی تقریب میں دستاویزی فلمیں ،تقاریر اور ملی ترانے پیش کیے گئے ،
اسلام آباد: بین الاقوامی اسلامی یونیورسٹی اسلام آباد میں سپیکٹرا 2018 کا آغاز ہو گیا جس میں طلباءکی کثیر تعداد ڈاکومینٹری، تقاریر، ڈراما، مضمون نویسی ،خوش خطی ، نعت ، میڈیا ہنٹ ، تکنیکی، سماجی، فنی ، دعوت و تربیت، سیمینارز ،لیکچرز تشہیری مقابلہ اور مختلف کھیلوں سمیت 50 سے زائد مقابلوں میں شرکت کر رہی ہے۔
سپورسٹس گالا 28 نومبر کو نیو کیمپس فٹ بال گراؤنڈ میں شروع ہو گا۔ان مقابلوں کا انعقاد جامعہ کے دفتر مشیر طلباءکے زیر اہتمام کیا گیا ہے جن کی افتتاحی تقریب جامعہ کے نیو کیمپس میں منعقد ہوئی ۔ افتتاحی تقریب کے مہمان خصوصی صدر جامعہ ڈاکٹراحمد یوسف الدریویش تھے جبکہ اس موقع پر مشیر طلباءڈاکٹر طارق جاویدتمام فیکلٹیوں کے ڈین، ایڈیشنل مشیر طلباءعبدالقادر ہارون، ڈائریکٹرز اور طلباءکی بڑی تعداد موجود تھی۔
افتتاحی تقریب میں مقابلوں کا باقاعدہ آغاز کرتے ہوئے طلباءکی تیار کی گئی دستاویزی فلمیں ،ڈارمے اور ملی ترانے پیش کیے گئے جن کو تقریب کے شرکاءنے بھرپور سراہا۔ تقریب سے خطاب میں ڈاکٹراحمد یوسف الدریویش نے کہا کہ تعمیری سرگرمیوں کا فروغ جامعہ کی اولین ترجیح ہے اور یہ میگا ایونٹ کئی ہونہار اذہان کو متعارف کرائے گاجو جامعہ اور ملک کا نام روشن کرنے کی صلاحیت رکھتے ہیں۔ انہوں نے کہاکہ ہم نصابی سرگرمیوں کی پزیرائی کی جائے گی جبکہ انہوں نے ایونٹ کے کامیاب انعقاد پر منتظمین کو بھی مبارکباد دی۔ صدر جامعہ کا کہنا تھا کہ اسلامی یونیورسٹی امت مسلمہ کو ایسے بہترین افراد مہیا کرنا ہے جو عصری علوم میں مہارت رکھنے کے ساتھ ساتھ اسلامی تعلیمات سے بھی مکمل آگاہی رکھتے ہوں۔ ان کا مزید کہنا تھا کہ اسلامی یونیورسٹی کی شعبہ تعلیم میں خدمات کو ملکی اور بین الاقوامی سطح پر سراہا جا رہا ہے اور ہمارے طلباءعالمی سطح پر اپنی خدمات پیش کر رہے ہیں۔ ہم ان کی صلاحیتوں کو نکھارنے میں اپنا بھرپور کردار ادا کرتے رہیں گے۔
قبل ازیں ،ڈاکٹر اطارق جاوید نے کہا کہ سالانہ ایونٹ سپیکٹرا نوجوان طلباءکی صلاحیتوں کو نکھارنے کے لیے ترتیب دیا گیا ہے جس میں حصہ لینے والے طلباءکی بھرپور پزیرائی کی جائے گی۔ انہوں نے کہا کہ جامعہ کے طلباءکو اپنے آپ کو منوانے کے لیے قومی و بین الاقوامی فورمز پر مواقع فراہم کرنے میں دفتر مشیر طلباءاپنی کاوشیں جاری رکھے گا۔ سپیکٹرا ایونٹ جامعہ میں 18 دسمبر تک جاری رہے گا جس میں خطاطی،کھیل ، ہم نصابی سرگرمیوں اور کئی ایک مقابلوں کا اہتمام کیا جائے گا۔